ابا آدم، اماں حوا کے بچو

آپ سے عمر میں بڑا ہوں، لیکن عمر محض ایک گنتی ہے — ایسی گنتی جس کا حساب آدمی نے لکیروں سے رکھا ہے۔ لکیریں زیادہ ہوں تو گنتی بڑھتی ہے، لکیریں کم ہوں تو گنتی گھٹ جاتی ہے۔ اسی طرح جسم پر بھی لکیریں پڑتی ہیں۔ جب لکیریں کم اور ہلکی ہوں تو آدمی بچہ کہلاتا ہے، اور جب لکیریں گہری ہو جائیں تو وہ خود کو بوڑھا سمجھنے لگتا ہے — جبکہ حقیقت میں وہ نہ پورا بوڑھا ہے، نہ پورا بچہ۔

آپ کہیں گے یہ کیسی باتیں ہوئیں؟ جی ہاں، آدمی نہ ہمیشہ بوڑھا رہتا ہے، نہ ہمیشہ جوان — بس بدلتا رہتا ہے۔

ایک بچہ اس دنیا میں پیدا ہوا۔ دادی نے اس کا نام “زید” رکھا۔ من موہنی صورت والا زید سب کی آنکھوں کا تارا بن گیا۔ پھر ایک سال بعد دیکھا تو وہ کافی بدل چکا تھا۔ پندرہ سال بعد آیا تو پہچاننا مشکل ہو گیا — چہرہ، قد کاٹھ اور آواز، سب بدل گئے، لیکن ایک چیز نہیں بدلی: اس کا نام۔

جوانی کے بعد بڑھاپے نے قدم رکھا تو کالے بال چاندی جیسے سفید ہو گئے، منہ پچک گیا، چہرے پر جھریاں نمودار ہوئیں، بڑی بڑی آنکھیں چھوٹی نظر آنے لگیں، کمر جھک گئی، اور گھٹنوں میں وہ جان نہ رہی جو جوانی میں تھی۔ غرض سب کچھ بدل گیا — مگر نام نہیں بدلا۔

جب بچہ اس دنیا میں آتا ہے تو اس کا کوئی نام نہیں ہوتا۔ گھر کے بڑے اس کا نام رکھتے ہیں، اور پھر سارے اسی نام سے اسے پکارنے لگتے ہیں۔

بچے کو اسی نام سے پکارا جاتا ہے۔ اماں ابا، نانا نانی، دادا دادی سے پوچھیے کہ جب آپ دنیا میں آئے تھے، اس وقت کیا آپ کا کوئی نام تھا؟

بہن بھائیو، دوستو! ہم سب کسی نہ کسی رکھے ہوئے نام کو اپنا کر فخر سے بتاتے ہیں کہ “میرا نام یہ ہے۔” مگر کیا ہم خود کو پہچان سکتے ہیں کہ نام رکھنے سے پہلے ہم کون تھے؟

پیارے بہن بھائیو! دنیا میں لوگ اپنا نام، اپنا کام اور اپنی پہچان بنانے میں لگے رہتے ہیں، مگر یہ سوچنے کی بات ہے کہ نام رکھے جانے سے پہلے، جب ہمارا کوئی نام نہیں تھا، تب ہم کون تھے؟